بطاطا سوتي

المكونات :

3- حبات بطاطا كبار مقطعة مكعبات متوسطة الحجم
1- حبة بصل متوسطة مقطعة شرائح
4 - فصوص ثوم كبار مقطعة شرائح
3- ملاعق كبيرة زيت
1- ملعقة كبيرة زبدة
التوابل:
ملح
فلفل أسود
فلفل أحمر
كمون
ثوم بودرة
الأعشاب العطرية:
زعيترة
معدنوس مقطع رقيق
اكليل الجبل

الطريقة :

أولا : نقشر البطاطا ونقطعها مكعبات متوسطة الحجم ماشي صغيرة باش ماتتفتتش وماشي كبيرة بزاف باش طيب من داخل وجي بنينة وباهية في التقديم
نحط البطاطا المقطعة في ماء بارد ونغسلها رايحة تطلق النشاء نتاعها والماء يتعكر لذلك نصفيها من هذاك الماء ونبدلو بواحد آخر صافي وبارد ونخليها على الأقل نصف ساعة هكذا من بعد كي نحطها في المقلاة ماتلصقش في المقلاة وماتلصقش في بعضاها



ثانيا : في الوقت اللي تترقد فيه البطاطا وجدو باقي المكونات : قشرو الثوم وقطعوه ونقيو المعدنوس وقطعوه و قشرو البصل وقطعوه شرائح

ثالثا : قطري البطاطا من الماء مليح لازم تكون ناشفة تماما من الماء باش ماتلصقش
قطريها في كسكاس أو على منشفة

رابعا: نحط مقلاة كبيرة وواسعة تسخن على نار قااااااوية ( أنا حطيتها على الكانون الكبير وقويت للنار على الآخر )
سخنو المقلاة بصح ماشي حتان تولي دير في الدخان
كي تسخن نحط الزيت والزبدة يسخنو مليح بصح ماشي حتان يتحرقو ويديرو الدخان لالا يسخنو مليح باش البطاطا كي نرميها ماتلصقش



خامسا : نرمي شوية ملح حوالي نص مغرفة صغيرة و نرمي البطاطا في المقلاة وما لازمش نكثر بزاف بطاطا بحيث تكون متراكمة فوق بعضاها ثلاث حبات كبار مرة وحدة يكفي باش طيب مليح وتتحمر كامل مليح لانو كمية الزيت قليلة وعلى هذي قلتلكم مقلاة كبيرة وواسعة ومن الاحسن تكون ثقيلة المقلاة باش البطاطا طيب مليح وماتتحرقش



لاحظو النار راهي قااااااااوية ماتنقصوش للنار

في الخمس الدقائق الأولى مانحركش البطاطا غير نحرك من ذراع المقلاة باش ماتلصقش البطاطا

سادسا : بعد عشر دقائق نضيف البصل لانو يتحرق بسرعة مانحطوش من الاول



والآن نبدى نحرك كل شوية نحرك والنار قاوية هنا الهدف انو البطاطا تتحمر وتكتسب لون مايهمش طيب من داخل
هذه المرحلة تتطلب حوالي ربع ساعة

سابعا : كي تتحمر البطاطا نضيف الأعشاب العطرية كاملة والتوابل كاملة والثوم شرائح وننقص للنار خلااااااااااااااااااااص يعني أقل درجة ممكنة نار هااااااااادئة جدا ونحرك المكونات باش تتخلط مع بعض وتكتسب النكهات من بعض
في هذي المرحلة تكون البطاطا راهي قريب طيب ، هنا تكمل طيابها وترجع طرييية وبنينة

نحرك بالشوية لانو البطاطا راهي الآن طرية بزاف
هذه المرحلة تأخذ حوالي خمسة حتى عشر دقائق
نذوق الملح إذا ناقصة نزيد الملح حسب الذوق





ثامنا : تقدم مباشرة مع دجاج ، سمك ، سلطة ......................... الخ

يمممممممييي